ინგლისის ნაკრების ყოფილი თავდამსხმელი და ამჟამად ფეხბურთის ექსპერტი გარი ლინეკერი ფიფას პრეზიდენტის, ჯანი ინფანტინოს იდეას გამოეხმაურა. ინფანტინო მსოფლიოს ჩემპიონატზე მონაწილე გუნდთა რაოდენობის გაზრდის ინიციატივით გამოდის.
“ფიფას პრეზიდენტმა ფეხბურთისთვის სასიკეთო საქმე უნდა გააკეთოს და არა ის, რაც მის ხელმეორედ არჩევას შეუწყობს ხელს. მან ფეხბურთის ინტერესები უნდა გაითვალისწინოს და არა – საკუთარი. გთხოვთ, არ გაანადგუროთ მსოფლიოს ჩემპიონატი”, – ლინეკერის სიტყვებს “ბიბისი” ციტირებს.